Ndiyakukhumbula mhla ndini kwedini
Mhla babexhelwa bexhokonxwa
benqunqelwa egoqweni
Bebuza oonina ukuba inzala yabo
yenziwa ntoni na
Ide yalishumi elinesibini iminyaka
sizibuka
Ezo ngcango zakho ziko [mzi]
lwezemfundo [wezemfundo]
Sibhala, sibala, sikhala, sidlala
sifunda izakhono zobomi
Abafundisi-ntsapho beqhuqha inkwethu
engqondweni
Besenjenjaya, mhla ndini,
bekhohlela imfundo beqinisa ngenduku
Namhla u-a uyaziwa ukuba uliqanda
elinentonga ecaleni
Namhla uqabaniso nomanyano
siyalwazi;
U-A no-U bakhupha u-O
Wayenjenjalo umfazi womthonyama
ezamana nabomgquba
Kwedini izibalo zibethwa ziyokuxela
Ezoqoqoqosho nezoshishino
kuphoselwana ngazo
Ngapha, nangapha nangaphaya
Imfuyo nezolimo zidlikidlwa zidlobe
okwamatakane abona unina
EzoKhenketho zigqwesile mpela
IKhompyutha icofwa-cofw’ icofeke kude
kunqande iincutshe
EzamaZwe neMozulu zinjenge sonka
semihla ngemihla
Ewe makwedini ezeNzulu-lwazi zigocwagocwa
ziingqondi
Sizincutshe nakwezobuGqirha
Siteketa sinjenjeya: De bhoyi
izikhikhingi debholi
Izinzame ezo zokufunda ulwimi
lokunxibelelana nabasemzini
Kunibalusi balo mhlambi.
Kunibomahamba le ndlela
Umzi wonke kaPhalo
Makunge lo mnyadala uzibulela
eminye emihle enjena
Kuniboso-theko, kuni zimbejembeje
ezixakath’ umxakatho
Esi sikhumba simnyama
nesembathileyo yanga singahlala isisinxibo senu
Kaloku lemigudu nalemizamo
asiyoyalize
Sifuna imvaba-ngeemvaba zazi
leNjongo ukuba
Ikhuphe izihlonitshwa ezinini
Zenifunde makwedini imfundo
niyityekeze
Nazi ukuba sekumzuzu niphumelele
olugqatso
Bafundisi ntsapho nomzi wonke;
Maz’anethole!
Halala Mzontsundu, Halala
Nditsho kuni mzi wase Joe Slovo,
halala!
Ndigoduseni mathenjwa ndini
ndivumeleni
Ndigoduseni mathenjwa ndini
ndivumeleni
Iyho!!
Imbongi ayinatyala, ibhodla ekuphakiweyo. Rhabula apha ke wena, ungafinci
Ngu: SNLV kaJolinkomo
